Kryeprokurori i Prokurorisë Themelore në Ferizaj, Shukri Jashari, për RTV Dukagjinin, ka thënë se nëse deputeti nga radhët Lëvizjes Vetëvendosje, Enver Haliti, ka ndonjë emër të ndonjë personi që i ka shkaktuar zjarrin në Gjimnazin e parë shqiptar, le të bashkëpunojë me Prokurorin e Shtetit.
“Deputetët mund të shkruajnë çfarëdo, por nëse deputeti Enver Haliti ka ndonjë emër, mund të vijë direk tek unë dhe as në polici nuk ka nevojë të shkojë, le të vijë tek unë le të ma sjellë emrin, unë menjëherë shkoj e arrestoj atë person, por jo me supozime, sepse ne me supozime nuk punojmë”, ka thënë Jashari për Portalin Dukagjni.
Më tej, ai ka thënë se hetimet janë duke u zhvilluar, por në këtë fazë janë ende konfidenciale.
Më poshtë mund ta lexoni reagimin e deputetit të Lëvizjes Vetëvendosje, Enver Halit.
Deputeti nga radhët Lëvizjes Vetëvendosje në Kuvendin e Republikës së Kosovës, Enver Haliti, ka reaguar pasi është djegur objekti i Gjimnazit të parë shqiptar “Ismail Qemali” në Ferizaj, i cili, sipas tij, kjo nuk është hera e parë që ky objekt digjet.
Më tej, deputeti nga LVV-ja e ka cilësuar si “Krimi të organizuar dëshiron që ta shlyejë historinë e Ferizajt”.
“Sot për herë të katërt ose të pestë i vihet flaka objektit të mbrojtur të trashëgimisë kulturore, ish-Gjimnazit të parë shqiptar ‘Ismail Qemali’ në Ferizaj”.
Haliti dyshon se prapa këtij zjarri qëndron dikush që e ka urdhëruar ketë, dhe i ka ftuar organet e rendit që ta zbulojnë këtë rast.
“Ftoj organet e rendit që ta hetojnë dhe të zbulohet urdhërdhënësi i këtij krimi”, ka përfunduar ai.