Ndonëse asnjë dëshmi nuk është dhënë, agjencia më e lartë e sigurisë në Rusi ka deklaruar se është arrestuar një gazetar i mediumit amerikan Wall Street Journal mbi dyshimet për spiunazh.
Nën dyshimin se po përpiqej të siguronte informacion të klasifikuar, Shërbimi Federal i Sigurisë (FSB) ka bërë të ditur se Evan Gershkovich u arrestua në Yekaterinburg.
Ky arrestim bën që Gershkovich të jetë gazetari i parë i një mediumi amerikan që arrestohet me akuza për spiunazh në Rusi që nga Lufta e Ftohtë.
Shërbimi federal i lartcekur pretendon se tashmë i arrestuari Gershkoviq po vepronte nga urdhra amerikan për të mbledhur informacion për aktivitetet e njërës prej ndërmarrjeve të kompleksit industrial ushtarak rus që përbën sekret shtetëror. Megjithatë, asnjë dëshmi nuk u dha për pretendimet.
Nëse shpallet fajtor, 32-vjeçari mund të përballet me 20 vjet burgim, transmeton REL.
Gershkovich raporton për Rusinë dhe Ukrainën si korrespondent në zyrën e Moskës të Wall Street Journal.
FSB-ja vuri në dukje se ai kishte akreditim nga Ministria e Jashtme ruse për të punuar si gazetar.