Zëvendëskryeministri Besnik Bislimi, pas ceremonisë së nënshkrimit të vendimit për liberalizimin e vizave për Kosovën, ka deklaruar se shteti do të fillojë me fushata informuese rreth heqjes së vizave.
Bislimi nga Strasburgu, ka thënë se ka qenë turpëruese refuzimi i vizave për qytetarët e Kosovës.
“E falënderoj secilin që ka qenë pjesë e këtij rrugëtimi, pjesëtarët e kabinetit dhe ministrat e linjës. Edhe qytetarët për durimin e tyre, liberalizimi do të mundësoj kontaktet mes njerëzve. Do të fillojmë fushata informuese që qytetarët të jenë të informuar se cka është dhe çfarë jo liberalizimin i vizave. Ka qenë turpëruese që qytetarëve t’u refuzohet viza, vitin vijues nuk do të kemi këso raste”, ka thënë ai.
Bislimi u shpreh, se Kosova i ka përmbushur të gjitha kriteret dhe ka përparuar jashtëzakonisht shumë në sundimin e ligjit dhe luftën kundër korrupsionit.
“Megjithatë dhamë argumentet tona, jo vetëm duke i përmbushur kriteret, por edhe ka përparuar në sundim të ligjit, luftës kundër krimit të organizuar dhe korrupsionit, këto nuk kanë mundur të tejkalohen e injorohen”, ka thënë ai.
Në Strasburg është nënshkruar akti ligjor i Bashkimit Evropian për liberalizimin e vizave për Kosovën.
Një ditë më herët, më 18 prill, Parlamenti Evropian e miratoi vendimin për vizat, duke përmbyllur procedurat vendimmarrëse për këtë çështje.
Miratimi u bë pa votim, pasi nuk pati asnjë kundërshtim, dhe i hapi rrugën qytetarëve të Kosovës që të lëvizin pa viza në vendet e zonës Schengen prej 1 janarit të vitit 2024.
Zëvendëskryeministri i Kosovës, Besnik Bislimi, ka marrë pjesë në ceremoninë e nënshkrimit, së bashku me ministren e Jashtme të Kosovës, Donika Gërvalla-Schwarz.