Deputetët e Lidhjes Demokratike të Kosovës (LDK) nuk do të vazhdojnë të qëndrojnë në sallën e Kuvendit të Kosovës për të marrë pjesë në votimet e pikave të rendit të ditës.
Kështu ka bërë të ditur shefi i Grupit Parlamentar të Lidhjes Demokratike të Kosovës (LDK), Arben Gashi, pasi tha se si arsye është “sjellja e papërgjegjshme” e ministrit të Financave, Hekuran Muratit.
Kjo pasi ministri Murati tha se çështja e të hyrave vetanake është rregulluar më herët prej LDK-së.
“Prej sot Grupi Parlamentar i LDK-së deklaron se nuk do të marrë pjesë në votime në seancat e Kuvendit, është puç institucional i kapjes së të hyrave vetanake të komunave. Sjellja e papërgjegjshme e Muratit na bën ne të mos jemi konstruktivë në seancat e Kuvendit, ai nuk e ka kuptuar Ligjin e Buxhetit. Prandaj ne si grup parlamentar e lëshojmë seancën, nuk do të marrim pjesë në asnjërën prej votimeve”, ka thënë Gashi.