I ftuar në “Five” në RTV Dukagjini, Cakolli ka vlerësuar demokracinë e Kosovës si të jokonsoliduar duke thënë se një zgjidhje si ajo e sotmja, mund të ishte arritur shumë më herët.
“Demokracia nuk është mjaftueshëm e konsoliduar për të tejkaluar mospajtimet me mjete demokratike por që sërish, kishim probleme të jetës parlamentare”, ka thënë Cakolli.
Ai ka thënë se në bazë të rregullores, Kryetari i Kuvendit, Glauk Konjufca, ka kompetenca për shqiptimin e sanksioneve ndaj veprimeve të deputetëve duke filluar nga tërheqja e vërejtjes e deri tek një masë e lartë, siç është largimi nga salla.
Mirëpo, Cakolli ka vlerësuar pozitivisht punën e Konjufcës.
“Fatmirësisht kryetari i Kuvendit, Glauk Konjufca, vlerësoj se ka pasur një rol të rëndësishëm në kalimin e ngërçit të ditës së sotëme e njëkohësisht, të javëve të fundit në Kuvend ngase, është arritur një dakordim mbi çështjen e komisioneve hetimore”, ka thënë ai gjersa ka shtuar se një zgjidhje e bërë sot, do kishte mundur të arrihet më herët.
Në seancën e kaluar, deputetët e opozitës, kishin filluar të godisnin tavolinat e të fishkëllonin, duke krijuar zhurmë me qëllim që t’i pamundësojnë punimet e Kuvendit të Kosovës.
Partitë opozitare, këtë e kishin bërë si shenjë revolte për mosthemelimin e komisionit hetimor parlamentar për energji.
Cakolli është pjesë e KDI-së që nga viti 2016, kur ai filloi punën si monitorues i punës së Kuvendit të Kosovës, në kuadër të programit për Demokratizim dhe Praktika Parlamentare.