Ministri i Bujqësisë, Faton Peci, në emisionin “FIVE” në RTV Dukagjini, për respektimin e ligjit të duhanit ka thënë se ka marrë shumë kritka rreth kësaj, sipas tij, nga ata që nuk e duan rendin dhe ligjin.
“Ligji është që të zbatohet strikt…Unë e kam detyrë dhe mandat ta zbatoj”, ka thënë ministri Peci, teksa shton se ishte habitur që Agjencia e Ushqimit dhe Veterinarisë (AUV) nuk kishte marrë ndonjë veprim lidhur me këtë çështje për një kohë të gjatë.
“Ne për dy muaj kemi fatkeqësisht më shumë gjoba sesa 10 vjet AUV për këtë çështje”, ka thënë tutje ministri Peci.
Ministri i Bujqësisë është shprehur se nuk është pretendimi i tij t’ia ndalojë askujt pirjen e duhanit, por sipas tij, nuk lejohet ky veprim në hapësira ku është e ndaluar me ligj.
“Nuk është pretendimi im me ia ndal askujt duhanin, por jo në hapësira ku është e ndaluar me ligj”, ka shtuar ministri Peci.
Minsitri Peci ka thënë se në bazë të statistikave, Kosova flitet se për kokë banori ka numrin më të madh të të prekurve të qytetarëve me kancerin. Sipas tij, në listë të “top faktorëve ose shkaktarëve” që ndikojnë janë edhe hapësirat publike me duhan.