Presidentja e Kosovës, Vjosa Osmani dhe presidenti i Shqipërisë, Bajram Begaj, do të marrin pjesë sot në ceremoninë e inaugurimit të presidentit të ri të Malit të Zi, Jakov Milatoviq.
Presidentja Osmani, siç u bë e ditur në komunikatë, ka theksuar se pjesëmarrja në këtë ceremoni është riafirmim i përkushtimit të vazhdueshëm për miqësi dhe bashkëpunim në rrugën e përbashkët euroatlantike të Republikës së Kosovës dhe të Malit të Zi.
Ndërsa, presidenca e Shqipërisë bëri të ditur se prezenca e presidentit Begaj në ceremoninë e inaugurimit të presidentit Milatoviq është tregues i vullnetit për forcimin e mëtejshëm të fqinjësisë së mirë si dhe vlerësim për rolin e faktorit shqiptar në stabilitetin dhe rrugëtimin euroatlantik të Malit të Zi.
Në ceremoninë e inaugurimit të presidentit të ri të Malit të Zi, Jakov Milatoviq pritet të marrin pjesë një sërë krerë shtetesh dhe qeverish nga vendet e rajonit të Evropës Juglindore, si dhe shumë zyrtarë të lartë evropianë dhe amerikanë. /KP