Policia e Kosovës ka bërë të ditur se ka arrestuar pesë persona (vëllezër) në lagjen “Përroi i Njelmët” në Prishtinë, pasi të njëjtit kanë qenë cak i një vjedhjeje dhe për t’u mbrojtur i kanë gjuajtur me armë zjarri.
Në vendin e ngjarjes janë konfiskuar dy AK-47, një pushko-mitraloz, 71 copë fishekë, ndërsa policia ka bërë të ditur se në këtë rast nuk ka të lënduar.
“Pas disa të shtënave me armë zjarri janë arrestuar pesë (5) të dyshuar meshkuj kosovarë (familjarë-vëllezër) nën dyshimin se te shtëpia e tyre persona të panjohur kishin tentuar të kryejnë vjedhje me çka dhe kanë filluar të shtien me armë zjarri ndërmjet njëri-tjetrit, por pa ndonjë pasojë, ndërkohë gjatë intervenimit njësiteve policore për reagim të shpejtë (NJRSH) dhe në rroba civile, këtyre të fundit të shtënat e armëve u kanë vishkulluar në drejtim të tyre, por pa pasoja. Në vendin e ngjarjes janë konfiskuar: Dy AK-47, një pushko-mitraloz, 71 copë fishekë, ndërkohë me vendim të prokurorit janë kontrolluar shtëpitë e tyre dhe pas intervistimit të dyshuarit janë liruar në procedurë të rregullt”, thuhet në njoftimin e policisë.