Presidenti i Ukrainës, Volodymyr Zelensky, ka këmbëngulur se Bakhmut “nuk është i pushtuar” nga Rusia, pasi një grup mercenar i mbështetur nga Moska kishte marrë kontrollin.
Presidenti ukrainas po fliste gjatë një vizite në Hiroshima, Japoni, për samitin e G7.
Themeluesi i Wagner, Yevgeny Prigozhin, kishte shpallur më parë fitoren në Bakhmut.
Por burime ushtarake ukrainase kanë thënë për BBC-në se ata ende e kishin nën kontroll një pjesë të vogël të ndërtesave në periferi të qytetit.
Në një konferencë për shtyp në ditën e fundit të samitit, Zelensky ka refuzuar të japë detaje të sakta. Por, ai ka thënë se qyteti, ku beteja më e gjatë dhe më e përgjakshme e luftës është ndezur që nga gushti, “nuk ishte i pushtuar” nga Rusia.
“Nuk ka dy ose tre interpretime të atyre fjalëve”, ka shtuar ai pas konfuzionit të mëhershëm rreth vërejtjeve të tij për statusin e qytetit.
Ishte në një video të postuar të shtunën që Prigozhin i Wagner pretendoi se luftëtarët e tij – të cilët kanë udhëhequr sulmin rus në Bakhmut – kishin kontrollin e plotë të qytetit.
Zelensky e ka krahasuar Bakhmutin me Hiroshimën, e cila u godit nga një bombë atomike në Luftën e Dytë Botërore, duke premtuar një “rindërtim” të ngjashëm të vendit të tij.
Më herët të dielën, ai ka vizituar Parkun Memorial të Paqes në Hiroshima me kryeministrin japonez, Fumio Kishida – kur Shtetet e Bashkuara hodhën bombën në qytet në 1945.
Zelensky vendosi një kurorë për ata që u vranë në sulm.
Lufta në Ukrainë ka dominuar samitin treditor të liderëve të G7 në Japoni, me Zelensky duke u takuar me disa liderë botërorë për të lobuar për më shumë mbështetje.
Këmbëngulja e tij dha rezultat. Në samit, ShBA-ja ka njoftuar se do të lejonte aleatët e saj perëndimorë që të furnizonin Ukrainën me avionë luftarakë të avancuar, duke përfshirë F-16 të prodhimit amerikan.
Megjithatë, ende asnjë vend nuk është zotuar të furnizojë avionët në Ukrainë.