Gazetari Vullnet Krasniqi ka thënë se mbetet pikëlluese fakti që qytetarët po paguanin pagesë shtesë për ta pranuar pasaportën nga VisaMetric, gjersa e dinin se po u vjedheshin paratë.
I ftuar në “Debat Plus” të RTV Dukagjini, sipas Krasniqit, pavarësisht se e dinin, qytetarët po e bënin për të mos i humbur terminet.
“Fillimisht e kam parë vendimin e publikuar nga avokati, ka pasur një rresht ku shkruan, përpos se i jep të drejtë zotit avokat, aty shkruan se është e paligjshme të bëhet edhe për të tjerët, edhe unë e pashë që opsioni është akoma, e thirra kameramanin nesër në ora 8;00, i shkova te dera. Aty filloi gjithçka. Aty i takova njerëzit, i pyeta njerëzit që akoma janë duke paguar. Për mua ka qenë shumë pikëlluese fakti që shumica e njerëzve e kanë ditur që nuk kanë nevojë me pagu, e kanë ditur që është e kundërligjshme, e kanë ditur se janë duke i vjedhur, por e kanë bërë pagesën për të mos humbur terminin…”.
Për muaj të tërë, VisaMetric ka detyruar qytetarët e Kosovës që të paguajnë shumën prej 30 eurosh për dorëzimin e pasaportës nga lokacioni i kësaj kompanie e deri te shtëpitë e tyre.
Tashmë, Prokuroria Themelore në Prishtinës ka nisur hetimet.