Asociacioni i Gazetarëve të Kosovës (AGK) ka reaguar me shqetësim ndaj një fushate të rrezikshme të fotomontazheve ndaj tre gazetarëve Berat Buzhala, Bekim Kabashi dhe Lavdim Hamidi.
Fotomontazhet, të cilat po shpërndahen në rrjete sociale, përfshijnë manipulime që tregojnë presidentin e Serbisë, Aleksandër Vuçiq, duke komentuar pozitivisht për gazetarët në mënyrë të pavërtetë.
“Fotomontazha e Buzhalës është krijuar në atë formë që të duket gjoja se presidenti i Serbisë, Aleksandar Vuçiq, e ka ripostuar një cicërimë të Buzhalës, duke thënë se është njëri nga gazetarët më të mirë kosovar. Ndërsa, Kabashit dhe Hamidit, u janë vendosur flamuj të Serbisë në ballë me mbishkrimet: ‘Zagarët e Vuciqit’, si dhe ‘Bravo vëlla’ (duke aluduar se kështu po iu drejtohet presidenti Serb dy gazetarëve)”, thuhet në reagimin e AGK-së
Sipas AGK-së, kjo fushatë denigruese rrit rrezikun e sulmeve online ndaj gazetarëve dhe familjeve të tyre.
Asociacioni i Gazetarëve të Kosovës ka bërë thirrje për ndalimin e këtyre fushatave të dëmshme, duke kërkuar që mediat të kenë mundësi të ushtrojnë profesionin e tyre pa u penguar.