Rreth 40 persona, kryesisht studentë, janë vrarë në një shkollë në Ugandën perëndimore të Afrikës nga rebelët e lidhur me grupin “Shteti Islamik”.
Siç raporton BBC, tetë persona mbeten në gjendje kritike pas sulmit në shkollën e mesme “Lhubirira” në Mpondwe.
Mes të vdekurve janë edhe djem që po qëndronin në konviktet e shkollës.
Shumë prej trupave u transferuan në Spitalin Bwera, tha zëdhënësi i policisë kombëtare Fred Enanga.
Sulmi ndodhi rreth orës 23:30 me orën lokale (20:30 GMT) të premten në shkollën në distriktin Kasese në Ugandën perëndimore.
Në këtë shkollë, vijojnë mësimet mbi 60 persona, shumica e të cilëve jetojnë atje.
Ndërkaq, disa nga vajzat janë rrëmbyer.
Disa prej trupave thuhet se janë djegur keq dhe do të duhet të kryhen teste të ADN-së për t’i identifikuar.
Sulmuesit thuhet se kanë djegur dyshekët e studentëve dhe gjithashtu mendohet se kanë shpërthyer bomba në rajon.
Në mesin e të vdekurve ka të ngjarë edhe anëtarë të komunitetit të gjerë. Nga ana tjetër, një numër studentësh mbeten të pagjetur.
Policia thotë se sulmi i së premtes u krye nga Forcat Demokratike Aleate (ADF) – një grup ugandan me bazë në Republikën Demokratike të Kongos.
Ushtarët po ndjekin grupin që u largua drejt parkut kombëtar Virunga në DRC, shtoi policia.
Sulmi ndaj shkollës është sulmi i parë i tillë në një shkollë në Uganda në 25 vjet.
Në qershor 1998, 80 studentë u dogjën për vdekje në konviktet e tyre në një sulm të ADF në Institutin Teknik “Kichwamba” pranë kufirit të DRC. Më shumë se 100 studentë u rrëmbyen.
Rebelët e ADF kanë vepruar nga brenda DRC për dy dekadat e fundit.
Në vitin 2021, sulmet vetëvrasëse me bomba në kryeqytetin e Ugandës, Kampala dhe pjesë të tjera të vendit, iu fajësuan ADF.