Ministri i Mbrojtjes, Armend Mehaj, ka deklaruar se marshimi i Ushtrisë së Kosovës gjatë së premtes në Mitrovicë paraqet një ushtrim të rregullt.
Me anë të një postimi në Facebook, Mehaj ka deklaruar se marshimi i ushtrisë nuk ka të bëjë me situatën e sigurisë në veri të vendit.
“Sot Regjimenti i tretë kanë realizuar marshimin kondicional i cili ka qenë i planifkikuar për 215 ushtarë tanë. Marshimi në Mitrovicë ka filluar nga kazerma “Minatori” deri në fshatin Frashër dhe është bërë kthimi sërish në kazermë. Marshime të tilla janë të rregullta, ky ushtrim gjithashtu ka qenë në kuadër të planit vjetor dhe është realizuar sot, prandaj bëjmë apel tek të gjithë që aktiviteteve të tilla mos t’iu jipet konotacion tjetër. Marshimi nuk ka të bëjë asgjë me situatën e sigurisë në veri të Republikës”, ka shkruar Mehaj.
Ky i fundit i ka lutur qytetarët e Republikës së Kosovës që të mos bien pre e lajmeve të rreme, gjersa theksoi se përgjegjësinë për sigurinë e qytetarëve e ka Policia e Kosovës.
“Përgjegjësinë për sigurinë e qytetarëve tanë e ka Policia e Kosovës e cila është në krye të detyrës dhe është duke kryer me shumë sukses punën e saj. Ju lutem mos të iu besoni dezinformatave dhe lajmeve të rreme.”, ka shkruar ai.
Të premten, regjimenti i tretë kanë realizuar marshimin kondicional të planifikuar për 215 ushtarë.