Udhëheqësi i Bjellorusisë, Alexander Lukashenko, ka thënë se themeluesi i forcave “Wagner”, Prigozhin gjendet në Bjellorusi.
Kështu raporton BBC gjersa citon agjensinë shtetërore të lajmeve bjelloruse, Belta.
Udhëheqësi bjellorus, Alexander Lukashenko, thotë se dëshiron të dëgjojë përvojën e grupit “Wagner” në luftë dhe të mësojë prej tyre.
Komandantët dhe luftëtarët e Wagner-it do të lejohen të shkojnë në mërgim në Bjellorusi me liderin e tyre, Yevgeny Prigozhin, sipas një marrëveshjeje me Moskën e ndërmjetësuar nga Lukashenko.
“Nëse komandantët e tyre vijnë te ne dhe na ndihmojnë… na tregoni se çfarë është e rëndësishme tani… kjo është e paçmueshme. Kjo është ajo që ne duhet të marrim nga Wagner,” tha Lukashenko gjatë një takimi me ministrin e tij të Mbrojtjes, sipas medias shtetërore.
Ai shton se nuk ka asnjë arsye për t’u frikësuar nga prania e tyre dhe se autoritetet bjelloruse “do t’i vëzhgojnë me vëmendje”.