Ministri i Punëve të Brendshme, Xhelal Sveçla, ka thënë se populli shqiptar përgjatë gjithë historisë është angazhuar dhe ka sakrifikuar për idealet e tij për liri e çlirim.
“2 korriku i vitit 1990 është ngjarja ndërsa pjesëmarrësit e asaj ngjarje janë vazhdimësia e këtyre përpjekjeve”, ka shkruar Sveçla.
Sveçla ka thënë se Deklarata Kushtetuese e 2 korrikut të vitit 1990 është një nga aktet themeltare të pavarësisë së Kosovës.
“Angazhimi i delegatëve të atij Kuvendi e sakrifica e madhe e brezave të tërë për liri e pavarësi, na e dëshmojnë të gjithë neve se e përbashkëta është më e vlefshme se interesi e siguria individuale, e se sakrifica për të ardhmen e mund rehatinë e së tashmes”, ka shkruar pos të tjerash Sveçla.
Këtë të diel janë mbushur 33 vjet që kur delegatët e atëhershëm të Kuvendit të Kosovës kanë miratuar Deklaratën Kushtetuese të 2 Korrikut.
Në këtë ditë historike, Kosova është shpallur njësi e veçantë, në kuadër të federatës së atëhershme jugosllave.
Deklarata e 2 Korrikut 1990 ishte akti që ka shënuar hapin historik institucional të pavarësimit të Kosovës, i cili është zhvilluar jashtë objektit të Parlamentit, në kushte të rrethimit nga forca të mëdha policore e ushtarake.
Deklaratën Kushtetuese mbi Kosovën si njësi të pavarur dhe të barabartë në kuadër të federatës apo konfederatës jugosllave e kanë shpallur në Prishtinë 111 delegatët shqiptarë të Kuvendit të Kosovës.