Deputeti nga radhët e Lëvizjes Vetëvendosje (LVV), Enver Dugolli ka deklaruar se Qeveria e Republikës së Kosovës, drejtuar nga Kryeministri Kurti, po tregon maturi në veprimet e saj karshi dialogut Kosovë-Serbi.
I ftuar në “FIVE” të RTV Dukagjini, Dugolli ka deklaruar se nuk është Qeveria Kurti ajo e cila dëshiron destabilitet në vend.
“Nuk është Qeveria e Kosovës ajo e cila po dëshiron destabiliteti. Përkundrazi, me vendimet që po i merr po tregon edhe maturi sepse jo gjithëherë…”, ka thënë ai gjersa shembull mori Policinë e Kosovës duke thënë se situatën në veri, e sheh një në tërsi, të pandarë mes politikës e sigurisë.
Ai thekson se Qeveria po përpiqet të krijojë kushte për të mbështur institucionet e rendit për ta kryer punën e tyre.
Lidhur me “sanksionet” e paralajmëruara nga BE-ja, Dugolli i mohon të jenë të tilla gjersa i cilëson si “masa të përkohshme”.
“Sanksione po përmenden ku vet ata, BE nuk po i quan të tilla por po i quan ‘masa të përkohshme’. Bëhet fjalë për disa masa që kanë për qëllim deeskalimin e situatës. Mënyra se si e shohim ne dhe BE-ja, dallojmë pak. Rënditja e hapave ka rëndësi për ne. Ne po themi se përderisa ka banda dhe njerëz që sulmojnë institucionet, policinë, gazetarët e KFOR-in, ne nuk mund t’i tërheqim njësit speciale”, ka deklaruar ai.
Deputeti Dugolli thekson se vendimet të cilat merret në institucionet e Kosovës janë të bazuara në ligje e që të njëjtat, nuk nënkuptojnë se janë në kundërshtim me SHBA-të.
Dugolli e ka cilësuar “serioz” kryeministrin Kurti duke thënë se “serioziteti i tij” në dialogun Kosovë-Serbi ishte me të drejtë e një gjë e tillë, thekson Dugolli, vërehet në hezitimin e Serbisë për të hedhur nënshkrime.