Kryeministri i Shqipërisë, Edi Rama, këtë javë do të nisë turin e tij ballkanik dyditor.
Ai do të fillojë me vizitën e tij në Shkup të enjten. Situata në veri të Kosovës, nisma “Ballkani i hapur” dhe procesi i Berlinit, janë ndër temat që do të jenë në fokus të bisedimeve mes kryeministrit shqiptar dhe homologëve të tij në rajon.
Në Maqedoninë e Veriut, Rama pritet të takohet me kryeministrin maqedonas, Dimitar Kovaçevski. Nga Shkupi, në të njëjtën ditë, kryeministri shqiptar do të niset për në Prishtinë.
Mirëpo, homologu i tij në Prishtinë, Albin Kurti, në një konferencë për media kur është pyetur për vizitën e Ramës në Prishtinë, ka thënë se është e arsyeshme një mbledhje e përbashkët e të dy qeverive, por “jo edhe takime të tjera”.
Ndërsa, të premten, Rama pritet të niset për në Beograd, ku në agjendë ka takimin me presidentin serb, Aleksandar Vuçiq.
Ai do të vizitojë gjithashtu edhe Malin e Zi dhe Bosnje-Hercegovinën, për të diskutuar me homologët e atjeshëm rreth rëndësisë së stabilitetit në rajon dhe tensionet e fundit ndërmjet Serbisë dhe Kosovës./ Portalb