Të paktën pesë persona humbën jetën, pasi një helikopter me turistë meksikanë u rrëzua pranë malit Everest të martën në mëngjes.
Helikopteri “Manang Air” u ngrit nga Surke në Nepal rreth orës 10 të mëngjesit me orën lokale duke u nisur për në kryeqytetin Katmandu, por 10 minuta më vonë, humbi kontaktin me kontrollin e trafikut ajror.
Ekipet e shpëtimit kanë gjetur trupat e pesë personave dhe po kërkonin për të gjashtin, tha Basanta Bhattarai, kryeadministratorja e qeverisë në zonë.
Zyrtarët e aeroportit thanë se kushtet e motit kishin ndikuar në devijimin e rrugës së planifikuar të fluturimit të helikopterit.
Sezoni turistik dhe alpinizmi përfundoi në maj me fillimin e sezonit të shirave dhe fluturimet turistike drejt maleve janë më pak të zakonshme në këtë periudhë të vitit, pasi dukshmëria është e dobët dhe kushtet e motit bëhen të paparashikueshme.
Nepali është i njohur për rekordin e tij të dobët të sigurisë së aviacionit, dhe incidenti i fundit vjen pothuajse gjashtë muaj pas një aksidenti avioni pranë qytetit qendror turistik të Pokhara, i cili vrau të gjithë anëtarët në bord, që ishin gjithsej 72 persona.
Vendi Himalayan ka disa nga pistat më të largëta në botë, të rrethuara nga majat e mbuluara me borë që përbëjnë një sfidë edhe për pilotët profesionalë.
Ndryshe, Bashkimi Evropian ka ndaluar të gjithë transportuesit nepalë në hapësirat e tij ajrore, për arsye sigurie.