Reperi i njohur nga Gjilani, Feronit Shabani i njohur si Fero, është arrestuar dje për dhunë në familje.
Rasti është konfirmuar edhe nga Policia e Kosovës. Ai dyshohet se e ka sulmuar fizikisht dhe e ka kanosur gruan e tij, Arbenita Ismajli.
Ndërsa në raportin e Policisë së Kosovës është raportuar se në Gjilan është ushtruar dhunë në familje ndaj një femre. Ndërsa i dyshuari me vendim të prokurorit është dërguar në mbajtje.
“Gjilan 11.07.2023 – 11:00. Është arrestuar i dyshuari mashkull kosovar pasi që i njëjti pas një mosmarrëveshje, ka sulmuar fizikisht dhe ka kanosur viktimën femër kosovare. Me vendim të prokurorit i dyshuari pas intervistimit është dërguar në mbajtje”, thuhet në njoftimin e policisë.
Burimet e “Sinjalit” brenda Prokurorisë tregojnë se Arbenita e shqetësuar është larguar nga banesa ku bashkëjeton me të dyshuarin dhe vajzën e tyre dhe ka kërkuar ndihmën e Policisë së Kosovës.
Sipas dëshmisë së Arbenitës, Fero e ka kërcënuar edhe me jetë, duke i thënë se do ta vrasë nëse ia merr vajzën.