Kyriakos Mitsotakis ka thënë se do të dëmshpërblehen ata të cilët humbën pushimet në Rodos për shkak të zjarreve.
Sipas mediave greke, thuhet se “qeveria greke, në bashkëpunim me autoritetet lokale, do të ofrojë një javë pushim falas në Rodos në pranverën ose vjeshtën e ardhshme” për të gjithë ata që e humbën atë për shkak të zjarreve.
Greqia është një vend i sigurt ishte mesazhi kryesor i kryeministrit, ndërsa sqaroi se turistët që dëshirojnë ta bëjnë këtë do të mund të kthehen në Rodos vitin e ardhshëm në pranverë për të shijuar ishullin dhe bukuritë e tij.
Ai theksoi se një operacion i madh për evakuimin e rreth 20 mijë njerëzve nga Rodosi, nga të cilët vetëm 15% u prekën nga zjarret, u krye në mënyrë shumë të sigurt.
Zjarre kemi pasur gjithmonë, si në Greqi ashtu edhe në Mesdhe, intensiteti i tyre është bërë më i madh për shkak të ndryshimeve klimatike, shpjegoi kryeministri.
Greqia ka si prioritet absolut përshtatjen dhe reagimin ndaj ndryshimeve klimatike dhe kalimin në forma të pastra të energjisë, por problemi nuk ka të bëjë vetëm me Mesdheun, ka thënë ai.
Në lidhje me imigracionin, ai vuri në dukje se qasja greke është e ashpër, por e drejtë, ajo ka arritur të reduktojë flukset drejt ishujve. Greqia kërkon rrugë legale për ardhjen e emigrantëve, por me kushtet e veta, jo me kushtet e trafikantëve, ka përfunduar kryeministri grek, Mitsotakis.