Njësia FAST-ILECU e Policisë së Kosovës ka arrestuar një shtetas gjerman i cili ishte në kërkim nga INTERPOL-i për akuzat e keqpërdorimit të fëmijëve në pornografi.
Siç ka njoftuar Policia, bashkëpunimi i ngushtë dhe koordinimi me agjencitë e sigurisë të shteteve aleate ka bërë të mundur kapjen e të dyshuarit në Lipjan të mërkurën rreth orës 11:50.
Pas operacionit të suksesshëm, i dyshuari është dërguar para organeve të drejtësisë.
“Policia e Kosovës vazhdon bashkëpunimin dhe koordinimin më policitë e shteteve mike, me qëllim të luftimit të akteve anti-ligjore, zbulimin e rasteve kriminale dhe dërgimin para organeve të drejtësisë të të dyshuarve të përfshirë në raste penale (kriminale). I dyshuari është lokalizuar dhe më pas arrestuar në Lipjan sot rreth orës 11:50. Ai dyshohet për përfshirje në veprimtari penale, konkretisht për ‘keqpërdorim të fëmijëve në pornografi”, thuhet në njoftim.
Zyra e INTERPOL-it në Gjermani kishte lëshuar urdhër-arrest ndërkombëtar kundër shtetasit gjerman.
“Policia, në këtë rast Njësia FAST-ILECU, sot më 02.08.2023, ka realizuar një arrestim të një shtetasi gjerman i cili ishte i kërkuar me urdhër-arrest ndërkombëtar të lëshuar për INTERPOL-in nga Gjermania”, thuhet tutje në njoftim të Policisë.
Me një akt-vendim nga Prokuroria ai do të mbahet në paraburgim për një periudhë prej 48 orësh.
Ndërsa, siç thuhet në njoftimin e Policisë, hetimet e mëtejshme do të vazhdojnë dhe në koordinim me institucionet tjera do të ndërmerren hapat e paraparë për raste të tilla.