Shefi i Grupit Parlamentar të Partisë Demokratike të Kosovës (PDK), Abelard Tahiri, pas vendimit të Gjykatës Kushtetuese për Ligjin për Zyrtarët Publikë për pranimin e kërkesave të PDK-së dhe LDK-së që të ndryshohen disa nene të këtij ligji, ka thënë se “kjo është fitore e radhës e demokracisë” dhe u dedikohet të gjithë qytetarëve.
Sipas tij, ky vendim është një dëshmi se angazhimi i PDK-së për “mbrojtjen e rendit kushtetues dhe vlerave demokratike, jo vetëm se është i vlefshëm, por edhe i domosdoshëm”.
Në një postim në Facebook, Tahiri ka thënë se ky aktgjykim i Gjykatës Kushtetuese për të shtatën herë më radhë konfirmon “veprimtarinë dhe aktivitetin antikushtetues të kësaj qeverie dhe paraqet në të njëjtën kohë, goditje të drejtpërdrejtë të tendencave dhe përpjekjeve të pushtetit autokratik të Albin Kurtit për të kapur dhe nënshtruar administratën shtetërore dhe të njëjtën ta kthejë në çerdhe të militantëve, familjarëve dhe partisë së tij”.
Ndryshe, Gjykata Kushtetuese ka marrë vendim që Ligji për Zyrtarët Publikë t’i dërgohet presidentes së Kosovës për shpallje, pa dispozitat e konstatuara në kundërshtim me Kushtetutën dhe sipas specifikave të përcaktuara në Aktgjykimin e Gjykatës.
Ligji për Zyrtarët Publikë, Gjykata Kushtetuese kërkon të ndryshohen disa nene