Turqia ka përsëritur se nuk është kundër zgjerimit të NATO-s, por sipas saj vendet që mbështesin terrorizmin nuk mund të jenë anëtarë të aleancës.
“E kemi bërë të qartë atë që na shqetëson dhe që përfshin bisedimet mes këtyre dy vendeve, Finlandës e Suedisë dhe organizatat terroriste, Partinë Punëtore të Kurdistanit dhe njësitë kurde të mbrojtjes, YPG. Dhe sidomos ndihmat në armatime që u janë dhënë atyre nga Suedia”, ka thënë Ministri i Jashtëm turk, Mevlut Cavusoglu.
Megjithatë, NATO dhe Shtetet e Bashkuara të Amerikës janë shprehur të bindura se Turqia nuk do ta ndalojë anëtarësimin e dy shteteve nordike në aleancën ushtarake perëndimore. Gjë të cilën Finlanda dhe Suedia janë duke e kërkuar tani, pas agresionit rus në Ukrainë.
Presidenti finlandez, Sauli Niinisto ka konfirmuar të dielën se Finlanda do të aplikonte për të hyrë në NATO. Ndërsa, socialdemokratët në pushtet në Suedi kanë njoftuar një ndryshim zyrtar të politikës që do t’i jepte mundësi Finlandës për të aplikuar brenda disa ditësh, transmeton “Reuters”.
Ministri i Mbrojtjes i Finlandës, Peter Hultqvist ka paralajmëruar se Suedia do të ishte në një situatë të rrezikshme nëse do të ishte i vetmi vend nordik që do të mbetej jashtë NATO-s.
“Turqia kërkon që këto dy vende të ndalojnë mbështetjen për grupet militante kurde të pranishme në territorin e tyre dhe të hiqnin bllokadën për disa shitje armësh në Turqi. Kam besim se do të jemi në gjendje t’u përgjigjemi shqetësimeve që ka shprehur Turqia në një mënyrë të tillë që të mos vonojë anëtarësimin,” ka thënë Sekretari i Përgjithshëm i NATO-s, Jens Stoltenberg.
Sekretari amerikan i Shtetit, Antony Blinken nuk ka pranuar të jap detaje nga bisedat në Berlin, por i ka bërë jehonë qëndrimit të Stoltenberg, duke shprehur bindjen se do të arrihet konsensus.