Dhjetëra autobusë me ushtarë ukrainas që ishin strehuar brenda fabrikës së çelikut Azovstal në Ukrainë, janë parë duke u larguar nga fabrika.
Ndonëse nuk është konfirmuar numri se për sa ushtarë bëhet fjalë, siç raporton Reuters gjatë ditës ishte spekuluar që në Azovstal gjendeshin rreth 600 ukrainas.
Deri më tani nuk dihet se si është dakorduar të realizohet ky evakuim i ushtarëve, në mesin e të cilëve janë edhe 40 të plagosur, që raportohet të jenë oficerë ukrainas.
Një komandant i lartë i forcave ukrainase në uzinën e rrethuar ka thënë se luftëtarët atje po zbatonin një vendim nga komanda e lartë ushtarake ukrainase për të shpëtuar jetën e personelit të shërbimit, por ai nuk ka dhënë detaje se cili ishte vendimi.
Ndryshe, më tetë maj, presidenti ukrainas, Volodymyr Zelenskyy, përmes një videoje, ka thënë se po vazhdonin përpjekjet për të shpëtuar të plagosurit dhe stafin mjekësor nga fabrika e rrethuar e çelikut Azovstal në Mariupol.
Sipas tij, zyrtarët ukrainas po përpiqeshin gjithashtu të evakuuojnë forcat ushtarake që kanë mbetur në fabrikë, të ngujuar në strehimore të thella nëntokësore dhe tunele, me shumë pak ushqim, ujë dhe furnizime mjekësore.
Por, ai ka pranuar se kjo ishte “jashtëzakonisht e vështirë”.
Zona industriale është bërë një simbol i rezistencës ukrainase, në një qytet që tani është pothuajse tërësisht i pushtuar dhe i shkatërruar nga rusët.
Ndërkaq, më gjashtë maj, qindra civilë janë evakuuar nga uzina Azovstal, nga operacionet e shpëtimit të udhëhequra nga OKB-ja.
Ndërsa, të dielën është shënuar dita e 75-të e agresionit rus në Ukrainë.