Sanksionet e Bashkimit Evropian të vendosura ndaj Kosovës, po e dëmtojnë vendin në aspektin socio-ekonomik.
Kështu është shprehur kryeministri i Kosovës, Albin Kurti, në një intervistë për prestigjiozen “Bloomberg”, gjatë qëndrimit të tij në Slloveni në kuadër të Forumit Strategjik të Bledit.
“Masat po na dëmtojnë në aspektin e mbështetjes financiare dhe materiale të fondeve, granteve dhe kredive që marrim nga BE-ja. Ato po dëmtojnë agjencitë tona shtetërore dhe komunitetin tonë të biznesit”, u shpreh Kurti.
Ai ka theksuar se të dyja palët duhet të ndjekin një marrëveshje për të përmirësuar marrëdhëniet përpara se aleatët të preokupohen me zgjedhjet në SHBA dhe Bashkimin Evropian.
“Ka një ndjenjë urgjence për zbatimin e marrëveshjes dhe normalizimin e marrëdhënieve ndërmjet Kosovës dhe Serbisë, të përqendruara në njohjen reciproke de-facto, më së voni deri në pranverën e vitit të ardhshëm”, tha kryeministri.
Për Kurtin, kthimi në marrëveshjen e miratuar nga të dyja palët në mars, është e vetmja rrugë përpara.
“Marrëveshja është ende në tavolinë,” tha ai.