Avokat, Skender Musa, ka folur për vrasjet e shumta që po ndodhin në vend.
I ftuar në emisionin “Five”, në RTV Dukagjini, Musa ka potencuar krenarinë e shqiptarëve, ku thotë se për një fyerje, kundërpërgjigjja është vrasja.
“Një element është elementi i trashëguar i të drejtës zakonore, ku shqiptarët mbajnë njëfar krenarie, e kjo në vendet tjera nuk ndodh, që për një fyerje ose për një shuplakë kundërpërgjigjja të jetë, vrasja”, ka thënë Musa.
Gjithashtu Musa thotë se element tjetër, se pse po ndodhin kaq shumë vrasje është edhe qasja e lehte në lidhje me armët në Kosovë.
“Është një element se kushdo që dëshiron të ketë armë në Kosovë, e gjenë pa problem. Nuk hetohen dhe nuk gjykohen siç duhet ata të cilët posedojnë ose merren me trafikim të armëve”, është shprehur Musa.
Musa tregon se nga praktika e tij si avokat, vrasjet në Kosovë nuk planifikohen sikurse në vendet e tjera, ai thotë se gjatë një përleshje njëri nxjerr armën dhe e vret kundështarin.