Kuvendi i Kosovës mblidhet të hënën me fillim nga ora 12:00. Kjo është bërë e ditur nga faqja zyrtare e Kuvendit.
Kjo seancë do të ketë një pikë rendi të ditës, e ajo është diskutimi për tekstet shkollore.
“Debat parlamentar lidhur me dështimin e Qeverisë së Republikës së Kosovës për sigurimin e teksteve shkollore për nxënësit e nivelit të arsimit fillor dhe arsimit të mesëm të ulët për vitin shkollor 2023/2024”, thuhet në njoftimin e Kuvendit.
Kuvendi mblidhet pasi opozita javën e kaluar bëri thirrje për seancë të jashtëzakonshme për të diskutuar në lidhje me tekstet shkollore.
Këtë thirrje e kanë iniciuar anëtarët e komisionit për arsim, të përkrahur nga deputetët e tjerë, me arsyen për dështimin e furnizimit me tekste shkollore të mbi 200 mijë nxënësve.
“Pasojat e paaftësisë dhe dështimit të kësaj qeverie, po i vuajnë mbi 200 mijë nxënës, mijëra prindër e mësimdhënës. Gjendja është e jashtëzakonshme dhe kërkon veprime urgjente”, ka njoftuar Eliza Hoxha nga Partia Demokratike e Kosovës.
Viteve të kaluara sigurimi i librave bëhej nga Qeveria e Kosovës, kurse këtë vit është vendosur që prindërit të subvencionohen me nga 80 euro për blerjen e teksteve shkollore.