Prokuroria Themelore në Mitrovicë ka bërë të ditur se ka arrestuar një person të dyshuar për sulmin me granatë dore në oborrin e shtëpisë së kryesuesit të Bordit të Trepçës, Bahri Hyseni, i cili ndodhi javën e kaluar.
Pas një hetimi intensiv, personi i dyshuar me iniciale F.B. është ndaluar dhe është i dyshuar për veprën penale “Shkaktimi i rrezikut të përgjithshëm”.
Kryeprokurori i Prokurorisë së Mitrovicës, Ismet Ujkani, ka konfirmuar lajmin për portalin Dukagjini.
Ndaj personit të dyshuar pritet të paraqitet kërkesa për caktimin e masës së paraburgimit pranë gjykatës kompetente, përkatësisht për të vendosur nëse ai duhet të mbahet në paraburgim deri në fillimin e procesit gjyqësor.
Shtëpia e kryesuesit të Bordit të Trepçës u sulmua me një mjet shpërthyes mbrëmjen e 30 gushtit.
Hetimi intensiv i prokurorisë dhe bashkëpunimi me policinë çoi në arrestimin e personit të dyshuar.
Megjithëse kanë qenë në shtëpi, sipas Hysenit, nuk ka pasur të lënduar, por vetëm dëme materiale.
Në vendin e ngjarjes, Hyseni ka thënë se kanë shkuar edhe pjesëtarët e policisë.
Për RTV Dukagjinin, zyrtarë nga Policia e Kosovës kanë treguar se janë dy vetura të dëmtuara dhe një pjesë e shtëpisë, derisa janë duke vazhduar hetimet për llojin e mjetit shpërthyes dhe motivet e mundshme.