Në nivelin më të lartë profesional është vlerësuar Policia e Kosovës nga ana e ish-policit dhe avokatit, Naim Rudari.
Në “FIVE” të RTV Dukagjini, avokati Rudari ka deklaruar se Policia e Kosovës mbetet insitucioni më i besueshëm në vend.
“Policia e Kosovës ishte nga zeroja kur u themelua dhe tani ka arritur më nivelin më të lartë profesional gjithëherë duke pasur vend për profesionalizëm shtesë dhe për përmisime. Nuk ka polici të përkyer dhe insitucione por Policia e Kosovës tani mund të krahasohet me gjithë rajonit por besoj fuqishëm se mund të krahasohet e barazohet me policitë më të sukseshme e profesionale në botë…Si institucion ndonëse ka kritika të vazhdueshme, është më i besueshmi, më i rëndësishëm dhe më i nevojshëm që duhet para së gjithash të vlerësohet dhe të kujdeset nga politika”, ka deklaruar ai.
Mirëpo, kritika pati njohësi i çështjeve të sigurisë, Bedri Elezi. Ai vlerëson se policia gjendet në gjendjen më të mjerueshme të saj e këtë e tha gjersa numëroi disa mungesa “bazike” të zytarëve policorë.
“24 vite pas, Policia e Kosovës është në gjendjen më të rëndë që ka qenë ndonjëherë. Do përmend disa fakte. Mbetet e çudistshme që kemi mungesa të furnizimit me paisje siç janë municionet, procedurat e tenderimit për veshmbatheje, veturat jashtë funksionit…kemi probleme me çështjen e shuajtjes, meritokracia mbetet problem serioz, pastaj çështja e sigurimit shëndetësor”, ka deklaruar ai.
Krahas kësaj, ai hedhi dyshime edhe në rekrutimin brenda këtij institucioni duke deklaruar se disa zyrtarë policor ndihmojnë në rekrutimin e familjarëve të tyre dhe jo vetëm. Sipas tij, ka edhe disa familje që brenda tyre janë një pjesë e madhe me këtë profesion.
Lidhur me këtë, avokati Rudari ka deklaruar se mungesat e tilla nuk janë në faj të zyrtarëve policor. Për rekrutimin, ai deklaroi se në fazat e testimit, pjesa me shkrim mbetet më e barabarta për aplikantët.
“Nuk janë fajin e policisë mungesat e ndryshme. Sa i përket rekrutimit të Policisë, vlerësoj dhe them me bindje të plotë se Policia e Kosovës ka pesë faza të trajtimit dhe testimit të qytetarëve që duan të bëhen policë dhe një fazë me shkrim, më seriozja dhe më e barabartja e mundshme. Fazat tjera janë më subjektive por faza e testimit me shkrim është më e sukeshhmja dhe më e drejta e mundshme”, ka deklaruar ai.
Krahas kësaj, ai theksoi se disa gjenerata të një familjeje të kryejnë këtë profesion mund të vie edhe si pasojë e dashurisë ndaj profesionit.
Në aspektin profesional, të dy bien dakord se Policia e Kosovës në aspektin profesional mbetet mirë e strukturar dhe e treguar e sukseshme në operacionet e saj.
Policia e Kosovës (PK) ka filluar punën më 6 shtator të vitit 1999, ndërsa tani po shënon 24-vjetorin e themelimit të saj.
Gjenerata e parë e pjesëtarëve të Policisë së Kosovës kishte gjithsejtë 176 pjesëtarë, të cilët pas trajnimit i shërbyen vendit si policët e parë në territorin e Kosovës.