Ministri i Mbrojtjes i Shqipërisë, Niko Pleshi, ka shprehur solidaritetin me qytetarët grekë, që u goditën rëndë nga përmbytjet në disa rajone të Greqisë. Po ashtu, ai u ka bërë thirrje të gjithë qytetarëve shqiptarë që gjenden në Greqi dhe janë në zonat e prekura nga përmbytjet që ta kontaktojnë ambasadën e Shqipërisë.
“Ambasada e RSH-së në Athinë njofton se qytetarët që ndodhen në zonat e prekura, mund të kontaktojnë drejtpërdrejt me Njësinë për Menaxhimin e Emergjencave Civile të Ministrisë së Krizave Klimatike dhe Mbrojtjes Civile të Greqisë, në numrin e aktivizuar të telefonit 📞 𝟏𝟏𝟐, i cili është vënë në dispozicion të shtetasve që kanë nevojë për ndihmë”, ka thënë Pleshi.
“Gjithashtu, iu bëjmë thirrje të gjithë qytetarëve shqiptarë të prekur nga përmbytjet në zonat problematike të Greqisë se për çdo nevojë t’i drejtohen Ambasadës të Shqipërisë përmes numrit të emergjencës 📱 𝟎𝟎𝟑𝟎-𝟔𝟗𝟒𝟏𝟔𝟓𝟖𝟏𝟖𝟑, në dispozicion të qytetarëve 𝟮𝟰/𝟳 dhe në adresën: embassy.athens@mfa.gov.al”, ka shtuar ai.
Më tutje, ai u ka shprehur ngushëllime familjeve që humbën të afërmit e tyre nga kjo fatkeqësi natyrore që e goditi shtetin grek.
“Solidaritet të plotë me qytetarët grekë, që u goditën rëndë nga përmbytjet në disa rajone të vendit. Ngushëllime familjeve që humbën të afërmit e tyre nga kjo fatkeqësi natyrore!”, ka përfunduar ai.