Policia e Kosovës përmes raportit të saj ka bërë të ditur se gjatë 24 orëve të fundit kanë ndodhur 5 raste të dhunës në familje.
Rastet kanë ndodhur në Prishtinë, Drenas, Obiliq, Ferizaj dhe në Vitomericë të Pejës.
“Prishtinë 10.09.2023 – 00:36. Ankuesja f/kosovare ka raportuar se i dyshuari kosovar, djali i saj i mitur, e ka sulmuar fizikisht dhe është larguar nga vendi i ngjarjes. Njësitet policore janë në kërkim të dyshuarit, ndërkohë që është informuar edhe prokurori lidhur me rastin.
Gllogoc 10.09.2023 – 02:37. Është arrestuar i dyshuari mashkull kosovar pasi i njëjti në gjendje të dehur, duke u kthyer nga një aheng familjar me prindërit e tij, për shkak të një mosmarrëveshjeje lidhur me përdorimin e veturës, të njëjtit i ka kanosur me vrasje. Me vendim të prokurorit, pas intervistimit të palëve, i dyshuari është dërguar në mbajtje.
Ferizaj 08.09.2023 – 20:00. Është arrestuar e dyshuara femër kosovare nën dyshimin se fillimisht djalin e saj, viktimën mashkull kosovar, e ka larguar nga dhoma e më pas nuk e ka lejuar që të futet në dhomën e tij dhe e ka kanosur se nëse futet në dhomë do t’i bëjë keq vetes apo ndokujt. Në lidhje me rastin është konsultuar prokurori i shtetit, me vendim të së cilit, e dyshuara është dërguar në mbajtje.
Vitomericë, Pejë 10.09.2023 – 18:35. Viktima femër/kosovare ka raportuar se bashkëshorti i saj, i dyshuari mashkull kosovar, e ka sulmuar fizikisht atë dhe motrën e saj, e cila ka kërkuar tretman mjekësor. I dyshuari ka ikur nga vendi i ngjarjes dhe ende nuk është hasur nga policia. Në lidhje me rastin është konsultuar prokurori i shtetit, rasti vazhdon të hetohet”.
Rasti i ndodhur në Obiliq, përveç që është cilësuar si dhunë në familje, është cilësuar edhe si posedim dhe përdorim i paautorizuar i armës.
“Obiliq 10.09.2023 – 02:50. Është arrestuar i dyshuari mashkull kosovar pasi i njëjti për shkak të një mosmarrëveshjeje që kishte me viktimën femër kosovare, bashkëshorten e tij, ka shtënë në ajër me armë zjarri. Njësitet policore në vendin e ngjarjes kanë gjetur dhe konfiskuar një pushkë gjuetie, 6 fishekë dhe 2 gëzhoja të armës së njëjtë, një sëpatë dhe një thikë. Me vendim të prokurorit, i dyshuari pas intervistimit është dërguar në mbajtje”.