Pas Kuvendit komunal të Leposaviqit, edhe ai i Zubin Potokut ka votuar pro anëtarësimit në në Asociacionin e Komunave të Kosovës.
Këtë e ka bërë të ditur nënkryetari i Vetëvendosjes në Mitrovicë të Veriut, Alban Uka.
“Pas Komunës së Leposaviqit edhe Komuna e Zubin Potokut i bashkohet Asociacionit të Komunave të Kosovës, përmes votimit që sapo ndodhi në Kuvendin Komunal të Zubin Potokut”, ka shkruar Uka.
Sipas procedurave, vendimet e kuvendeve komunale do të dërgohen në Ministrinë e Administrimit të Pushtetit Lokal, për vlerësim të ligjshmërisë dhe pastaj pritet të dërgohet tek Asociacioni i Komunave të Kosovës për shqyrtim.
Ndryshe, më 22 gusht, edhe Mitrovica e Veriut është anëtarësuar në Asociacionin e Komunave të Kosovës.