Një këmbësor ka humbur jetën pasi është goditur nga vetura në rrugën “Xhevat Dogani” në Drenas.
Këtë e ka konfirmuar për Portalin Dukagjini, zëdhënësja e Policisë së Kosovës për rajonin e Prishtinës, Flora Ahmeti.
Ahmeti ka thënë se vdekjen e viktimës e ka konstatuar ekipi mjekësor në QKUK.
“Rreth orës 10:40, kemi pranuar informatën se në rrugën “Xhevat Dogani”-Drenas, ka ndodhur një aksident trafiku me pasoja fatale. Në këtë aksident kanë qenë të përfshirë, një këmbësor dhe një veturë në lëvizje. Si pasojë e aksidentit lëndime të rënda trupore kanë pësuar këmbësori, i cili nuk ka arritur të përballojë plagët dhe i njëjti ka ndërruar jetë”, ka thënë Ahmeti.
Shoferja e veturës të përfshirë në aksident është arrestuar nga policia.
“Vdekjen e tij e ka konstatuar ekipi mjekësor në QKUK. Aktualisht, policia ka nisur një hetim për zbardhjen e rrethanave që kanë quar deri te ky aksident trafiku, ndërkohë që ngasësja e automjetit të përfshirë në aksident është arrestuar”, ka vijuar ajo.