Ekonomisti, Mustafë Kadriaj, në emisionin “Rreth e Rrotull” në RTV Dukagjini ka diskutuar lidhur me qarkullimin e madh të monedhës dy euro dhe paratë e falsifikuara.
Sipas Kadriajt, në atë moment që ka falsifikim të parasë, “dëmtohen tri komponentët kryesore të parasë siç është pjesa e këmbimit, kursimit dhe pjesa e matjes së vlerës së produktit”.
Ai ka bërë të ditur se falsifikimi i parasë shkakton dëme të pariparueshme.
“Shqetësimi jashtëzakonisht i madh. Diçka e pariparueshme. Por ka aparate që mundet të vërehen, ndërsa tek paratë metalike diçka e pamundur, shkaku që nuk ka pajisje për kontrollimin e tyre”, ka thënë Kadriaj.
Një gjë pozitive, sipas Kadriajt, është se Kosova nuk emiton paratë false, dhe që Kosova duhet të jetë pjesë e gjithë shteteve që duhet të luftojnë paratë false.
“Kosova, gjithsesi duhet të jetë pjesë e gjithë shteteve që duhet të luftojnë paratë false. Kosova nuk e ka bajrakun për të emituar paratë në euro. Nuk emitojna paratë në euro. Dhe përgjegjësia kryesore bie në barren e Bankës Qendrore e BE-së, ku e ka qendrën kryesore në Frankfurt të Gjermanisë”, ka theksuar Kadriaj.
Kadriaj ka shtuar se “Hapi i parë duhet të bëjë Bashkimi Evropian dhe Banka Qendrore e BE-së. Në Kosovë nuk është gjetur se emitohen paratë false. Dhe shumica e dilerëve që janë kapur nga autoritetet e rendit në Kosovë, kanë prejardhje nga vendet e tjera e jo shtetas tonë”.