Ministria e Punëve të Brendshme e Serbisë ka konfirmuar se Milan Rodojçiq i është përgjigjur ftesës së autoriteteve serbe për të dhënë deklaratë në cilësinë e qytetarit për sulmin ndaj Policisë së Kosovës në veri të Kosovës, të dielën e 24 shtatorit në Banjskë të Zveçanit.
MPBS-ja shtoi se Prokuroria e Lartë Publike në Beograd do të njoftohet për deklaratën e Radoiçiqit në formë raporti, e cila më pas “do të ndërmarrë masat dhe veprimet e mëtejshme procedurale nën autoritetin e saj”.
“Milan Radoiçiq iu përgjigj ftesës së autoriteteve shtetërore të Republikës së Serbisë dhe sot në orën 10, i shoqëruar nga avokati i tij, ka hyrë në ambientet e Ministrisë së Punëve të Brendshme, për të dhënë deklaratë si shtetas për rrethanat e ngjarjes tragjike në qytetin e Banjskës, herët në mëngjesin e së dielës, më 24 shtator 2023. Për sa më sipër do të njoftohet Prokuroria e Lartë Publike në Beograd në formë raporti, e cila do të ndërmarrë masa dhe veprime të mëtejshme procedurale brenda juridiksionit të saj”, thuhet në njoftimin e Ministrisë së Punëve të Brendshme, raporton b92.net.
Ndryshe, Radojçiq është lideri i grupit terrorist serb që kreu sulmin ndaj Policisë së Kosovës javën e kaluar në veri të vendit.
Kujtojmë që dje janë bastisur pesë lokacione, shumica e tyre ishin pronat e Radojçiq.
Pas bastisjes, Prokuroria Speciale e Kosovës njoftoi se ato që janë sekuestruar në cilësi të provave materiale janë:
- 2 Automjete Mercedes
- Argjend 4.84 Kg
- 2 Motor 4X4
- 1 Barkë-Anije
- 7 DVR
- 2 Pllaka antiplumb me dy mbrojtës
- 3 Thika
- 2 Rutera
- 2 Çelësa të veturave
- 5 Gëzhoja
- 1 Dronë
- 5 USB
- 1 Kamera GoPro- SSD
- 1 Video kamerë me kartelë
- 1 Shënjestër optike
- 1 Spray
- 7 telefona celularë
Derisa ministri i Punëve të Brendshme të Kosovës, Xhelal Sveçla publikoi video nga vila e tij, ai e krahasoi atë si Pablo Escobar të rajonit.
Mes tjerash, Radojçiq ka dhënë dorëheqje nga posti i tij në Listën Serbe si nënkryetar i kësaj partie.