Ministri i Brendshëm, Xhelal Sveçla, e ka konfirmuar se ka bërë kërkesë në Ministrinë e Bujqësisë që prona e Milan Radojçiqit të kalojë në kuadër të dikasterit të tij.
Sipas Sveçlës, vila e Radojçiqit duhet t’i kalojë në shfrytëzim Policisë së Kosovës si bazë e Policisë.
Ai ka theksuar se prona ku është ndërtuar vila, është pronë e Agjencisë Pyjore të Kosovës.
“Kompleksi i Milan Radojçiqit është i ndërtuar në agjencinë pyjore të Republikës së Kosovës. Bypasi i tunelit është uzurpuar nga ky kompleks nga Milan Radojçiq. Jam në bisedime me ministrin e Bujqësisë, Faton Peci, që kjo pronë t’i kalojë ministrisë së Punëve të Brendshme dhe më pastaj të shfrytëzohet nga Policia e Kosovës, për stacion për njësi me barka në departamentin e kufirit”, ka thënë ministri.