Kryetarja e Dhomave të Specializuara të Kosovës (DHSK), gjykatësja Ekaterina Trendafilova, ka njoftuar se do të shqyrtojë mundësinë e modifikimit të dënimit të Nasim Haradinaj për lirimin e tij me disa kushte.
Siç thuhet në komunikatën për media, ky vendim është marrë pasi ajo më parë ka kërkuar një raport në lidhje me sjelljen e Haradinajt gjatë periudhës së tij në objektin e paraburgimit të DHSK-së.
Po ashtu, në komunikatë thuhet se edhe pse veprat penale për të cilat Haradinaj u dënua janë të rënda, gjykatësja Trendafilova ka theksuar se ka disa faktorë që mund të favorizojnë modifikimin e dënimit të tij.
Lexo edhe: Gjykata Speciale konfirmon lirimin e Gucatit
“Kryetarja mori parasysh se megjithëse veprat penale për të cilat z. Haradinaj u dënua janë padyshim të rënda duke marrë parasysh efektin mjaft negativ të zbulimit të informacionit konfidencial mbi dëshmitarë (të mundshëm), ishin disa faktorë që mund të peshojnë në favor të modifikimit të dënimit të tij. Kryetarja gjithashtu vuri në dukje shprehjet e keqardhjes prej z. Haradinaj gjatë seancës gojore dhe zotimit të tij për moskryerjen e veprimeve të tjera që mund të karakterizohen si vepra penale kundër administrimit të drejtësisë”, thuhet në komunikatën për media të DhSK-së.
Ajo ka theksuar shprehjet e keqardhjes dhe zotimin e tij për moskryerjen e veprimeve të tjera që mund të karakterizohen si vepra penale kundër administrimit të drejtësisë.
“Sidoqoftë kryetarja theksoi se z. Haradinaj ka precedentë disiplinorë në Njësinë e Paraburgimit (NJP). Rrjedhimisht, kryetarja gjykoi se megjithëse z. Haradinaj ka ndërmarrë disa hapa drejt rehabilitimit, ka ende vend për përmirësim. Për këtë arsye kryetarja urdhëroi Administratoren që të paraqesë raport në lidhje me sjelljen e Haradinajt në NJP në të ardhmen brenda një periudhe të caktuar në kontekst të vendimit mbi modifikimin e dënimit të tij”, thuhet tutje në komunikatë.
Vendimi mund të lexohet këtu në faqen e DHSK-së në internet.