Miftar Mehmeti, një nga minatorët grevistë të Trepçës, ka pësuar sulm kardiak mëngjesin e së hënës.
Kështu ka treguar vetë ai përmes një postimi në Facebook, teksa ka kërkuar nga qytetarët dhe Qeveria që të ndihmojnë minatorët sepse sipas tij, ka edhe shumë minatorë të tjerë që nuk janë në gjendje të mirë shëndetësore.
“Miq të dashur, ju lus të luteni për shëndetin tim. Nuk jam mirë me shëndet. Shëndeti mu rëndua sot në horizontin e 10 gjatë faljes së Namazit të Sabahut e pata një sulm të vogël kardiak. Pas intervenimit të stafit të emergjencës, stafit mjekësor, gjendja më është stabilizuar por prapë po kam probleme herë pas here. I lus të gjithë ata që munden të bëjnë diçka për minatorët, shumë prej tyre janë të sëmurë, ktheheni kokën kah minatorët, ju lus juve Qeveri e Kosovës dhe të tjerëve që keni mundësi”, shkroi ai.
Menaxhmenti i Trepçës ka marrë vendim që t’i suspendojë nga puna kryetarin e sindikatës, Ibrahim Jonuzin, nënkryetarin e sindikatës, dy anëtarë dhe një minator.
Vendimi u është komunikuar përmes telefonit vetëm pak minuta më parë.
Sindikata ka bërë të ditur për RTV Dukagjinin se nuk u është thënë arsyeja e suspendimit dhe ende nuk kanë marrë një vendim zyrtar.