Kryetari i AAK-së, Ramush Haradinaj, ka përkujtuar 34-vjetorin e rënies së heronjve, Afrim Zhitia dhe Fahri Fazliu.
Haradinaj ka thënë se përpjekjet e shqiptarëve për liri nuk kanë reshtur dhe se ato ishin të vendosura.
“Sot, në 34-vjetorin e rënies, kujtojmë e nderojmë dy heronjtë e kombit, Afrim Zhitia e Fahri Fazliu. Ata i takojnë brezit të hershëm të lëvizjeve për liri, i atdhetarëve që ranë për çlirimin e Kosovës. Pa asnjë dyshim, Afrimi e Fahriu janë atdhetarët e hershëm që me jetën dhe veprën e tyre motivuan brezat që në fundshekullin e kaluar t’i japin fund robërisë përmes luftës sonë çlirimtare”, ka thënë Haradinaj.
Haradinaj është shprehur se lavdia u takon të rënëve në çdo etapë të historisë.
Sot bëhen 34 vjet nga rënia e dy dëshmorëve të kombit, Fahri Fazliu dhe Afrim Zhitia, nga komuna e Podujevës.
Lexo dhe: 34 vjet nga rënia heroike e Afrim Zhitisë dhe e Fahri Fazliut
Fahriu dhe Afrimi ranë më 2 nëntor të vitit 1989, në “Bregun e Diellit” në Prishtinë, pas një luftimi të pabarabartë me forcat e armikut.