Në Dhomat e Specializuara të Kosovës (DhSK) në Hagë e ka vazhduar dëshminë Gjergj Dedaj, i cili është dëshmitari i 33-të (me kodin W03825) në çështjen gjyqësore ndaj Hashim Thaçit, Kadri Veselit, Jakup Krasniqit dhe Rexhep Selimit.
Këtë të martë, Dedaj u ankua përsëri se nuk i është plotësuar kërkesa e tij që seanca të mbahet e mbyllur. Ai tha se për shkak se seanca është e hapur, atij mund t’i rrezikohet familja e tij.
“Me vetë ftesën që ma keni bërë, ka qenë padrejtësi ndaj meje… Kam të drejtë të protestoj, jam përgjegjës për vete, për familjen e fëmijëve të mi. Kam kërkuar gjatë bisedave që seanca të jetë e mbyllur, të mos më rrezikohet familja dhe e ardhmja në Kosovë, nëse qëllimi është të nxjerrën çka ju dëshironi, të hapni plagë të reja është tjetër gjë”, tha ai.
Dëshmia e së hënës: Dedaj “nervozohet” me pyetjet e prokurores: Po ma shkatërroni jetën
Dedaj foli edhe për UÇK-në, duke thënë se po të kishte mundësi, do t’u jepte atyre armë bërthamore.
“Unë me pas mujt UÇK-së i kisha dhënë armë bërthamore, sepse serbët kanë vrarë fëmijë, gra e invalidë”, tha ai.
Dëshmia e së hënës: Dedaj në Gjykatën Speciale: Rugova ishte themelues i shtetit, Thaçi e përmbylli procesin e pavarësisë
Dedaj tha se gjatë vizitës së tij dhe delegacionit prej afërisht 40 personash, UÇK-ja ka pasur të drejtë të dyshonte.
“UÇK ka pasur të drejtë me dyshu se dikush në grupin prej 40 veta të ketë diçka, unë marr përgjegjësi vetëm për vete”, tha ai.
Prokurorja e pyeti Dedajn nëse i kanë dhënë ushqim gjatë ndalimit në Qirez. Kjo pyetje nuk i pëlqeu, duke e quajtur si provokim.
Dedaj tha se UÇK-ja, i ka dhënë ushqim e birra.
“Provokimet ndaj meje nuk kanë të ndalur… Nuk kemi shku atje në pushime në Maldive as në pushime verore, Kosova digjej, s’kishte bukë as për fëmijë. E kam përshkru dje se fëmijët hanin bukën me baltë”, tha ai.