Komisioni Qeveritar për Persona të Zhdukur ka njoftuar se gërmimet, që kanë filluar në mëngjesin e sotëm në Tusuz të Prizrenit, kanë rezultuar me gjetje të mbetjeve mortore potencialisht të viktimave të luftës.
“Gërmimet e filluar në mëngjes tanimë kanë rezultuar me gjetje dhe zhvarrosjen e mbetjeve mortore që mund t’iu përkasin viktimave të luftës që vazhdojnë të jenë në Listën e Personave të Zhdukur”, thuhet në njoftim.
Mbetjet mortore të zhvarrosura do të dërgohen në Institutin e Mjekësisë Ligjore për ekzaminimet e nevojshme dhe identifikimin përmes analizës shkencore të ADN-së dhe pasi të përfundojnë të gjitha procedurat do të përcaktohet numri i individëve të zhvarrosur dhe identiteti i tyre.
Tutje, thuhet se në kuadër të zbatimit të Planit të Punës nën koordinimin e Komisionit Qeveritar për Persona të Zhdukur, njësitet e Drejtorisë së Policisë për Hetimin e Krimeve të Luftës, ekspertët mjekoligjorë të Institutit të Mjekësisë Ligjore, me mbështetjen edhe të ekspertëve të EULEX-it, janë duke kryer gërmimet vlerësuese në tri lokacione në hapësirat e varrezave të qytetit të Prizrenit.
“Gërmimet në Tusuz të Prizrenit, janë duke u kryer në zbatim të urdhëresës së Gjykatës Themelore të Prishtinës, Departamentit Special”, thuhet tutje në njoftim.
Lokacioni në Tusuz të Prizrenit është lokacioni i trembëdhjetë i adresuar në kuptim të gërmimit vlerësues gjatë këtij viti, brenda territorit të Republikës së Kosovës.