Kryesia e Kuvendit të Kosovës, në mbledhjen e mbajtur të hënën (13 nëntor), ka caktuar seancën e re plenare për të enjten (16 nëntor 2023), ku pritet të diskutohet dhe të votohet buxheti për vitin 2024.
Sipas rendit të ditës, në seancën e caktuar për të enjten, për diskutim dhe votim do të jetë Ligji për Ndarjet Buxhetore për vitin 2024, sipas rekomandimit të Komisionit për Buxhet, Punë dhe Transfere.
Ndryshe, në mbledhjen e saj të 171-të, Qeveria e Kosovës miratoi Projektligjin për ndarjet buxhetore për vitin 2024.
Kryeministri Albin Kurti në fjalën e tij tha se buxheti për vitin 2024 do të jetë 3 miliardë e 314 milionë euro.
Sipas tij, përmes buxhetit të propozuar parashihet që koeficienti i pagave në sektorin publik do të jetë 110 euro, pesë euro më shumë sesa vitin e kaluar.
Buxheti për vitin 2024, sipas kryeministrit Kurti, do t’i kushtojë rëndësi të veçantë mbrojtjes e sigurisë, prandaj, sipas tij, është rritur numri i policëve edhe për 500 të tjerë dhe numri i ushtarëve edhe për 600 të tjerë.
Sipas Kurtit, arsimi do ta ketë mbështetjen e nevojshme, shëndetësia ku do të vazhdohet në investimin e renovimit të spitaleve dhe blerjeve të pajisjeve të teknologjisë së fundit.
Duke folur për drejtësinë, ai ka deklaruar se buxheti për Ministrinë e Drejtësisë është i rritur 31% më shumë sesa ka qenë për vitin e kaluar.
Krejt kjo që të zbatohen deri në fund reformat e nisura në drejtësi.