Me ndeshjet e së martës mbrëma kanë përfunduar kualifikimet e rregullta për Euro 2024.
21 përfaqësueset tashmë dihen dhe në verën e ardhshme do të garojnë në Evropianin në Gjermani. Ndërsa tri përfaqësueset e fundit përcaktohen përmes plejofit.
Si fituese e grupit E, Shqipëria do të zërë vend në vazon e dytë për shortin e Evropianit.
Shqipëria ka fituar grupin E të kualifikimeve, duke lënë prapa Çekinë, Poloninë, Moldavinë dhe Ishujt Faroe.
I kishte katër fitore, tri barazime e një humbje.
24 përfaqësueset do të ndahen në gjashtë grupe për Evropian. Nga secila vazo do të jetë nga një përfaqësuese në grup.
Në vazon e parë janë Gjermania, Portugalia, Franca, Spanja, Belgjika e Anglia.
Vazoja e dytë përbëhet nga Hungaria, Turqia, Rumania, Danimarka, Shqipëria dhe Austria.
Vazon e tretë e përbëjnë Holanda, Skocia, Kroacia, Sllovenia, Sllovakia, Çekia.
Vazoja e katërt përbëhet nga Italia, Serbia, Zvicra dhe tre fituesit e plejofit.
Shorti do të tërhiqet më 2 dhjetor prej orës 18:00 në Hamburg.
Ndërsa tri skuadrat që do të jenë pjesë në plejof do të paraqiten përfaqësueset që dështuan në kualifikime të rregullta dhe bazuar në rezultatet e edicionit të kaluar të Ligës së Kombeve. Shorti i plejofit tërhiqet të enjten.
Ndeshjet e plejofit luhen në mars të vitit të ardhshëm. Polonia, Uellsi, Estonia, Izraeli, Bosnjë-Hercegovina, Finlanda, Ukraina, Islanda, Gjeorgjia, Greqia, Kazakistani e Luksemburgu kërkojnë tri biletat e fundit për Euro 2024.