Presidentja e Kosovës, Vjosa Osmani, ka pritur të mërkurën në takim Grupin Avokues për Mbrojtjen e Grave.
Siç njofton Presidenca, ky grup është një grup joformal i përbërë nga 12 organizata joqeveritare, ku përfshihen organizata nga grupe të cenueshme dhe strehimoret në Kosovë, si dhe organizata të cilat kanë për qëllim angazhimin në promovimin e të drejtave të njeriut dhe parandalimin e dhunës në familje.
Presidentja Osmani është njoftuar nga afër lidhur me sfidat të cilat po përballen gratë në Kosovë dhe nevojën e vazhdueshme për plotësimin e vazhdueshëm të kornizës ligjore, e cila garanton mbrojtje për viktimat e dhunës në familje dhe dhunës mbi baza gjinore.
E para e vendit është shprehur e hapur për bashkëpunim të mëtejmë dhe koordinim të ngushtë me organizatat në këtë drejtim dhe në fusha të tjera, të cilat garantojnë mbrojtjen dhe avancimin e të drejtave të grave në vend.