Ish-kryenegociatorja e Kosovës në dialogun me Serbinë, Edita Tahiri, në “Debat Plus” në RTV Dukagjini, ka thënë se kryeministri Albin Kurti dhe zëvendësi i tij, Besnik Bislimi, u kanë dhënë autonomi serbëve të Kosovës.
“Dokumenti është shumë i rrezikshëm, me elemente që ka realisht e ka bërë Republikën Srpska në Kosovë”, ka thënë Tahiri.
Tahiri ka thënë se Rezoluta 1244 e kthen Kosovën pas, dhe se i jep UNMIK-ut sovranitet.
“E para, Rezoluta 1244 e kthen Kosovën pas, i jep UNMIK-ut sovranitet, ndërsa shteti ynë që shpallëm pavarësinë në vitin 2008 nuk ka sovranitet, sepse u ngrit prapë UNMIK-u. Problemi i dytë është që krahas Asociacionit, kjo qeveri, me Bislimin dhe Kurtin, i dhanë autonomi minoritetit serb të Kosovës”, ka thënë Tahiri.
Sipas ish-kryenegociatores, kjo është bërë me “formulën” e vetëmenaxhimit.
“Vetëmenaxhimi si formulim për qeverisje definohet në kartën e Këshillit të Evropës për pushtetin lokal dhe shumë qartë në kartë thuhet se vetëmmenaxhim është vetëqeverisja e grupit apo minoritetit të caktuar, i cili ka kompentenca edhe për prona publike apo shtetërore në shtetin ku vepron në kuadër të kornizës ligjore që ekziston. E këtë autonomi ka rrezik që serbët të kenë kompetenca mbi Trepçën, Ujmanin. Prandaj, këto janë elementet e Republikës Srpska dhe elementi i fundit, Asociacoini ka gati ministri të jashtme…”, ka thënë ajo.