Avokati Shkelzen Sopjani ka thënë se grabitësit për plaçkitjen e armatosur në Suharekë kanë përdorur diku rreth 10 vetura.
“Grabitësit përdorin diku rreth 10 vetura për të kryer plaçkitjen”, ka thënë Sopjani.
Ai ka thënë se personat e përfshirë në këtë grabitje nuk kanë qenë të panjohur për organet e rendit, pasi të njëjtit, sipas tij, kanë qenë të përfshirë edhe në akte terroriste.
“Për këtë rast, Policia e ka kryer një punë të mirë, është themeluar një taskforcë prej Policisë së kosovës, ka pasur zyrtarë të njësive të ndryshme, rajone të ndryshme. Hetimi është bërë në disa rajone, ka taskforca aktive varësisht prej intensitetit të veprave penale”, ka vijuar ai.
Ndryshe, një i vrarë, dy policë të plagosur, shtatë të arrestuar dhe një i dyshuar në arrati është bilanci total nga grabitja e një argjendarie në Suharekë që ndodhi javën e kaluar, ka konfirmuar Policia e Kosovës të enjten.
Policia ka zhvilluar një operacion gjatë ditës së enjte, ku ka mbetur i vrarë një nga personat që dyshohet se mori pjesë në grabitjen e një argjendarie në Suharekë.
Sipas Policisë, fillimisht viktima ka shtënë me armë zjarri në drejtim të policëve, ku për pasojë ka mbetur i plagosur një polic që është jashtë rrezikut për jetë. Policia është detyruar të vetëmbrohet.
“Gjatë zhvillimit të operacionit policor, një i dyshuar ka shtënë me armë zjarri në drejtim të zyrtarëve policorë duke ua rrezikuar drejtpërdrejt jetën e tyre, me ç’rast është plagosur një zyrtar policor. Zyrtarët policorë në vetëmbrojtje janë detyruar të përdorin forcën proporcionale, duke arritur të neutralizojnë një të dyshuar”, thuhet në njoftim.
Gjatë këtij aksioni, janë arrestuar edhe katër të dyshuar, duke e çuar numrin total të të arrestuarve në shtatë.
Njëri nga të arrestuarit u lirua më herët për mungesë provash, ndërsa dy të tjerëve u është caktuar masa e paraburgimit pasi dyshohet se kanë dhënë ndihmë në përgatitjen e planit për grabitje.
Vlen të theksojmë se më 22 nëntor kishte ndodhur plaçkitja e armatosur në një argjendari në qytetin e Suharekës. Në tentativën për ta parandaluar plaçkitjen, është plagosur një polic i Kosovës në këmbë. Nga ky incident, përveç një polici të plagosur, kishte mbetur edhe një tjetër i lënduar.