Zëdhënësi i Partisë Demokratike të Kosovës (PDK), Faton Abdullahu, ka reaguar pas sondazhit në kuadër të OMNIBUS-it, që realizohet nga UBO Consulting për matjen e opinionit publik.
Përmes një postimi në Facebook, Abdullahu ka thënë se për PDK-në janë dhënë tri opsione rreth opozitarizmit: Memli Krasniqi, Hashim Thaçi dhe Kadri Veseli. Për LDK-në, vetëm kryetari i saj.
Sipas tij, nëse llogariten të gjitha përqindjet drejt, Abdullahu vlerëson se PDK-ja del partia e parë me 30.6 për qind si më aktivja.
“Qe një shembull i manipulimit të sondazhit dhe esencës së lajmit. Për PDK-në janë dhënë tri opsione rreth opozitarizmit: Memli Krasniqi, Hashim Thaçi dhe Kadri Veseli. Për LDK-në, vetëm kryetari i saj. Nëse llogariten të gjitha përqindjet drejt, PDK del partia e parë me 30.6 % – si më aktivja. I kuptojmë tendencat e partive që në bashkëpunim me media të shtyjnë përpara lajme të caktuara – sepse efekti i punës së tyre në teren nuk po shihet askund”, shkroi ai.
Gjithsesi, thotë Abdullahu, “kot e keni: PDK është nisur, po rritet e fuqizohet çdo ditë dhe nuk ka kush që e ndalë”.
Reagimi i Abdullahut është prezantuar edhe në emisionin “Debat Plus” në RTV Dukagjini, ku po prezantohen rezultatet e sondazhit të realizuar nga UBO Consulting.
Bazuar në një sondazh në kuadër të OMNIBUS-it, që realizohet nga UBO Consulting e të porositur nga RTV Dukagjini për matjen e opinionit publik se kush po bën opozitën më të fortë ndaj kryeministrit Albin Kurti, lideri i Lidhjes Demokratike të Kosovës (LDK), Lumir Abdixhiku, ka dalë i pari në listë, duke kryesuar me 29.6 për qind.
Sipas elektoratit, përkatësisht 1 mijë e 66 të të anketuarve, në vend të dytë është listuar kryetari i Partisë Demokratike të Kosovës (PDK), Memli Krasniqi, me 17.4 për qind, duke lënë pas kryetarin e Aleancës për Ardhmërinë e Kosovës (AAK), Ramush Haradinaj, me 16.3 për qind.
Kështu ka bërë të ditur drejtori ekzekutiv i RTV Dukagjinit, Ermal Panduri, në emisionin “Five” në RTV Dukagjini, teksa prezantoi të dhënat e fundit, ku RTV Dukagjini si porositës i sondazhit ka përfshirë disa pyetje.