Ministri i Jashtëm i Britanisë së Madhe, David Cameron, shprehu shqetësimin e tij të thellë për situatën e krijuar në veri, ku mbeti i vdekur rreshteri policor, Afrim Bunjaku.
Në një seancë të Parlamentit britanik, ministri i Punëve të Jashtme i Mbretërisë së Bashkuar, David Cameron, ka sjellë në vëmendje incidentin e fundit në veri të Kosovës, të njohur si sulmi i Banjskës, teksa tha se duhet të tregohet zhgënjim më i madh me Qeverinë e Serbisë.
Cameron, më katër janar të këtij viti, zhvilloi vizitë njëditore në Kosovë, ku përsëriti se siguria e Ballkanit është interes nacional i Britanisë së Madhe.
Atij iu parashtruan disa pyetje për situatën në Kosovë nga deputetja Alicia Kearns.
“Ne pozicionin tonë [të Britanisë së Madhe], duhet të jemi të qartë në qëndrimin dhe politika tona. Ne duhet të tregojmë zhgënjim më të madh për Qeverinë e Serbisë. Duhet t’i pyesni vetë BE-në dhe SHBA-në nëse ato janë të zhgënjyera [me Serbinë]. Por nga bisedat që kam pasur, ka zhgënjim. Kemi pamje të qartë se çfarë ndodhi atë ditë. Po t’i shohim armët, numrin e njerëzve – jam i vetëdijshëm se sa i rrezikshëm ishte ai sulm”, ka thënë Cameron.
Cameron ka theksuar se Britania vazhdon ta mbështetë politikën e dialogut.
“Politika jonë është e ashpër dhe realiste. Stuart Peach [i dërguari i Britanisë për Ballkanin Perëndimor] shkoi në Serbi dhe diskutoi me Vuçiqin pas sulmit në Banjskë. Do të vazhdojmë ta bëjmë këtë”, ka shtuar ministri i Jashtëm i Britanisë.
Deputetja pyeti Cameronin edhe për mendimin e tij për demokracinë në Serbi, teksa përmendi parregullsitë në zgjedhjet në Serbi dhe për raportimet për rrahjen e politikanit opozitar serb, Nikolla Sanduloviq nga shërbimi i sigurimit serb (BIA).
Një ditë para kësaj, Sanduloviq kishte publikuar një postim duke kërkuar falje për vrasjen e 50 anëtarëve të familjes Jashari në Prekaz më 1998.
Cameron tha se janë të shqetësuar për mënyrën se si janë zhvilluar këto zgjedhje dhe se kanë kërkuar hulumtim dhe shkrimin e raporteve për parregullsitë në to.
Lidhur me rrahjen e politikanit opozitar serb, ministri britanik tha se janë të informuar dhe se tingëllon ekstrem shqetësuese dhe se kanë kërkuar informacion shtesë, por nuk duan të reagojnë pa u njoftuar me të gjitha faktet.
“Jemi të vetëdijshëm nga raportimet për Sanduloviqin. Po presim më shumë informacione. Është shqetësuese. Do të reagojmë pasi të kemi informacionet e plota”, ka thënë Cameron.