Kryeministri i Kosovës, Albin Kurti, teksa ka folur për çështjen e Asociacionit të Komunave me Shumicë serbe, ka thënë se Asociacioni nuk është top prioriteti i normalizimit të marrëdhënieve me Serbinë.
Sipas tij, prioritet mbetet Marrëveshja bazike, andaj kreu i ekzekutivit u ka bërë thirrje të gjithëve që të mos ta nxjerrin nga paketa draft-statutin apo Asociacionin si një çështje.
Ai ka thënë se nuk duhet ngatërruar hierarkia e gjërave teksa insiston në paketën e ofruar e cila u refuzua nga pala serbe.
Kryeministri thotë se së pari duhet të nënshkruhet marrëveshja bazike, aneksi i zbatimit dhe më pas mund të flitet për Asociacionin.
Kurti theksoi se të gjithë ata që e nxjerrin Asociacionin nga paketa, do t’i bëjë dëm Kosovës.
“Më 26 tetor, dy ditë pas vërejtjeve të mia kapitale për draft-statutin e Asociacionit si propozim euro-amerikan kam ofruar që ta nënshkruajnë një paketë ku është marrëveshja bazike, aneksi i zbatimit dhe ky draft statuti për të cilin i kam pasur vërejtjet, por atje në Bruksel u tha se është çështje urgjente. Agresioni rus në Ukrainë nuk po përufdnon, edhe një luftë në Lindjen e Mesme nisi, andaj është e domosdoshme që të bëjmë diçka shpejt, por oferta ime u refuzua nga pala serbe. Të mos ngatërrojmë hierarkinë e gjërave, e më pas mund të flasim për Asociacionin. Të gjithë ata që e nxjerrin Asociacionin nga paketa i bëjnë dëm Kosovës. Nuk mund ta nxjerrësh Asociacionin nga paketa e ta bësh prioritet për nga koha ose në qendër për nga hapësira e tryezës. Asociacioni nuk është top prioriteti i normalizimit, është marrëveshja bazike prandaj të gjithë kolegët e mi jo vetëm në Kosovë, i lus që të mos e nxjerrin nga paketa draft-statutin apo Asociacionin si një çështje. Një shtet vlerësohet mbi atë se si respekton minoritetet e pakicave”, tha ai.