Analisti, Ylli Hoxha, ka thënë se vendimi që kryetarët të mbesin pas zgjedhjes ka qenë gabim taktik i Qeverisë Kurti, sepse, sipas tij, dy prej kryetarëve nuk janë nga radhët e Lëvizjes Vetëvendosje, por nga radhët e Partisë Demokratike të Kosovës.
Siç thotë ai, pozita fillestare e Kurtit nuk ka qenë që të mohohet e drejta e peticionit.
Elementi i dytë, për të cilin Hoxha mendon se është delikat, është çështja e referendumit.
“Çfarë kemi bërë është çështja e referendumit. Vendi më i paduhur që të testohet referendumi në këtë Kosovë është veriu. Është një indikacion jo i mirë kah po ecim. Qeveria, gjegjësisht, edhe PDK është dashur që në ditën e parë të dorëhiqen”, tha ai.
“Ka qenë pozicioni i kryeministrit dhe presidentes që nëse doni t’i largoni i largojmë përmes ligjeve në fuqi, aplikimit të atyre neneve që i mundësojnë. Ky ka qenë pozicioni i tyre. Pozicioni me kryetarët shqiptarë mendoj që është në kundërshtim me pikëpamjen tonë mbi mënyrën se si duhet të zgjidhet çështja e veriut, jemi në kontekst të dialogut në të cilin kemi hyrë për të zgjidhur një problem më të madh. Ideja se ti zgjedhësh dhe insistosh ta mbash detyrën duke e përfaqësuar një pakicë brenda një shumice që është kundërshtuese në esencë përçon një mesazh jodemokratik”, tha Hoxha në “Debat Plus”.
Ai konsideron se detyra e kryetarëve të zgjedhur ka përfunduar në ditën e zgjedhjeve.
“Është dashur të jenë aty si zyrtar, mos të lihet vendi vakant, kryetari i komunës është dashur të jetë në atë karrige që mos me ia lënë Serbisë shembjen e sistemit qeverisës në veri, por jo të insistohet se do ta mbajë edhe më tutje, sepse ka problem legjitimiteti”, shtoi Hoxha.